SKOOLREËLS

‘n Gedetailleerde uiteensetting van die skoolreëls is in die leerlinge se dagboeke.

Waardevolle items

Leerlinge word gemaan om nie waardevolle items skool toe te bring en dit dan in tasse of baadjiesakke te los nie. Indien groot bedrae geld skool toe gebring moet word, word dit direk na opening by die betrokke onderwyser of finansiële kantoor inbetaal.

Opdragte van personeel moet te alle tye gehoorsaam word.

Leerlinge moet personeel altyd hoflik en met die nodige respek behandel. Daarom staan seuns nie met hul hande in hul broeksakke met ‘n personeellid en praat nie.

Huiswerk

Die leerling se persoonlike rooster moet voor in sy/haar huiswerkboek geplak wees. Persoonlike besonderhede voor in die huiswerkboek moet voltooi word. Opdragte moet gereeld, netjies en in ink gedoen word. Die versuim om huiswerkopdragte uit te voer, is ‘n oortreding. As riglyn vir die tyd wat daagliks aan huiswerk bestee moet word, geld die volgende:

Graad 8: 1½ – 2 uur

Graad 9: 2 – 2½ uur

Graad 10: 2½ – 3 uur

Graad 11 & 12:  3 uur

Skoolbesoek

Stokkiesdraai: Die gevare verbonde aan hierdie praktyk kan nooit genoeg beklemtoon word nie.  Daarom word stokkiesdraaiery in ‘n baie ernstige lig beskou, wat selfs tot skorsing of uitsetting kan lei.

Siekte: Ouers word versoek om leerlinge tuis te hou as hulle werklik siek is.  Dit dien geen doel om skool toe te kom en dan heeldag in die siekekamer te lê nie.  Aan die ander kant moet ‘n kind ook van vroeg af leer dat daar nie sommer vir elke bakatel by die huis gebly word nie.  Leerlinge wat by die skool siek word, moet hulle toestand onder die aandag van die betrokke vakonderwyser/ algemene kantoor bring en gaan onder geen omstandighede self na die siekekamer toe nie.  Reëlings om u kind te kom haal a.g.v. siekte word deur die kantoorpersoneel getref.  Leerlinge mag nie self ouers deur die loop van die dag skakel nie.

Afwesigheidsbriewe: Indien ‘n leerling afwesig was, moet daar ‘n aanvaarbare skriftelike verskoning vanaf die ouer ingedien word op die eerste dag wat die leerling weer die skool besoek.  Hierdie brief word by die betrokke klasvoog ingedien.  Waar leerlinge drie of meer opeenvolgende dae afwesig is, word ‘n mediese sertifikaat verlang. ‘n Mediese sertifikaat word ook verlang vir enige afwesigheid gedurende ‘n eksamen of afwesigheid tydens ‘n toets.  Die leerling se naam en van moet duidelik daarop verskyn.  Die dokter moet ook stipuleer dat die leerder nie in staat is om toets/eksamen te skryf nie. Waar laasgenoemde nie ingehandig word nie, sal ‘n leerling nul (0) vir die betrokke toets /vraestel kry.

Eksamen en Toetse: Leerders is onderworpe aan die toets- en eksamenreëls soos vervat in die skool se beleid ten opsigte van toetse en eksamens.  Alle skoolbeleide is by die Hoof beskikbaar vir insae.

Skoolure: Die skool begin soggens om 07:10 en die skooldag duur tot 14:00.  Geen leerling mag die skoolterrein verlaat sonder skriftelike toestemming van die Hoof of die Adjunkhoofde nie.  Versoeke vir sodanige verlating van die terrein, moet skriftelik deur die ouers aan die skool gerig word en hierdie briewe moet die kantoor die vorige dag of die betrokke oggend voor skool bereik.

Afsprake: Afsprake by dokters of tandartse moet verkieslik nie gedurende skoolure plaasvind nie.

Vakansies: Amptelike vakansies begin gewoonlik om 11:00 en versoeke om vroeër te vertrek, kan ongelukkig nie oorweeg word nie.

Tasse

Om handboeke te beskerm, moet leerlinge tasse hê wat versterkte afskortings bevat.

Handboeke

Handboeke is en bly die eiendom van die skool en word op ‘n leenbasis aan leerlinge verskaf.  Leerlinge is aanspreeklik vir alle handboeke aan hulle uitgereik en moet verlore en vernielde boeke self vervang.  Die koste ten opsigte van vernielde en verlore handboeke beloop R300 per boek, betaalbaar by die finansiële kantoor.

Boodskappe en besoekers

Slegs dringende boodskappe sal deur die skool aan leerlinge oorgedra word.

Selfone en “Ipods”

Enige elektroniese toestelle word op eie risiko skool toe gebring en moet tydens skoolure af wees.  Indien ‘n leerder se selfoon tydens klastyd deur ‘n personeellid geneem word, moet die leerder se ouer(s) dit persoonlik tydens skoolure in die algemene kantoor kom afhaal.  Die leerder is ook welkom om dit persoonlik aan die einde van die kwartaal af te haal.

Skoolsaal

Geen leerders word in die saal sonder die toesig van ‘n onderwyser toegelaat nie.  Die saal moet te alle tye netjies en skoon gelaat word.

Sosiale media

Enige kommentaar of optrede op enige sosiale netwerk waardeur die skool se goeie naam skade berokken word, word in ‘n baie ernstige lig beskou en sal tot dissiplinêre optrede lei.  Indien die leerder sy reg op privaatheid wil uitoefen deurdat foto’s van hom/haar nie op die skool se sosiale media platforms gebruik word nie, moet die leerder die skool vooraf in kennis stel.  Dit bly die leerder en ouer se verantwoordelikheid om die skool hiervan in kennis te stel.

Oortreding van skoolreëls

Die oortreding van enige skoolreël(s) lei tot die onmiddellike beëindiging van die voorreg tot busvervoer.  Detensie vind Maandae na skool plaas en is verpligtend.  Die herhaalde oortreding van skoolreëls kan lei tot ‘n dissiplinêre verhoor waartydens ‘n leerder geskors of in oorleg met die GDO, versoek word om die skool te verlaat.

Busvervoer

Leerders wat gebruik maak van busvervoer, soos verskaf deur die skool, is onderhewig aan die skool se beleid ten opsigte van busvervoer.